有關生日蛋糕趣事

自中學起，生日蛋糕已離我很遠，彷彿那只屬孩童的專有。演變到後期，生日飯餐好已成為隊長總廚對已成人的我的一點心意。
今年幸運地酒店奉送一件插有爉燭寫有經典又不失老土的"happy birthday"蛋糕。總廚向侍應生道聲多謝。侍應生哥哥亦禮貌回應：唔好客氣，件餅都係係自助餐甜品部免費攞過黎，其實都任人攞。
我平身最討厭別人虛情假意，對於侍應生毫不造作的回應更甚為感動。
燭光點點的蛋糕在昏暗的環境裡尤其美麗，由於枝爉燭的長度屬普通短，由於點爉燭其間臭B去了玩耍，由於大家很久沒見過爉燭要不停與它合照，總之很多原因下當我想要許願時枝爉燭都未吹便熄了…
我無奈地看著那剩下可憐的一條燭芯，隊長興奮地說，最後一滴都唔浪費！
老表則在旁輕聲說句：油盡燈枯？
嗯~很吉利的一個好開始！二十x歲的我很貪心，希望我在乎的每一位都身體健康 ，日日都笑點低笑口常開！

有關生日

生日與家人一起平平淡淡吃餐便飯便覺幸福，可惜我家只有我一人。正想著一個宅女呆在家中迎接生日的時候，感謝Maria 及 Persia 兩位姐姐"共"上黎〜
 
Yaki 真的夠老友，雖然平時她已是個很賢妻的一位少女，家中的家務大小事感謝她的貢獻都處理得井井有條，這天生日，她更特意在前一晚便預備弄香草烤雞給我。


是日菜單：
溫芷琪溫芷雞
陳倩瑛布朗尼
陳綺雯速食雯


沒錯，我的生日蛋糕是自己焗給自己的～
經過這一次一人一分力後，另外兩位小姐都對一人一道菜的活動表示十分支持，更相約下次回來後要弄個有主題的傳統中菜。

平凡中的感動，謝謝你們！

Banana Muffin

材料：
低筋麵粉 ------ 130g
高筋麵粉 ------ 190g
or 自發粉------  240g
原味乳酪 ------ 60g
淡忌廉 --------- 60g
泡打粉　 ------ 3g
梳打粉　 ------ 2g
蜜糖　　 -------60g (optional)
鹽　　　 --------1/8tsp
牛油　 -------- 100g
雲呢拿油　 ------1/2tsp
糖　　　 --------70g
蛋　　　 ------- 2隻
蕉　　 ------- 2隻

做法 :

1) 預熱焗爐180°C，在蛋糕模內掃牛油
2) 糖及牛油全蛋液拌勻打至淡黃呈現乳霜狀態
3) 逐隻逐隻蛋加入拌勻
4) 加入乳酪、雲呢拿油及淡忌廉拌勻
5) 加入蜜糖拌勻
5) 將所有粉類一起過篩加入用膠刮攪拌至無乾粉狀
6) 把香蕉加入搞伴
7) 放入焗爐中烘烤30分鐘後取出

留一手

以前時時聽說師傅教徒弟總會留一心的陰謀論。我不信。直至早兩天請教清潔特攻隊隊長如何煮可樂雞翼後，我終於明白何解會有"留一手"的說法。

話說很早已請教隊長如何煮可樂雞翼，隊長說：好簡單架咋！煎好啲雞翼加埋啲可樂去煮就搞掂！

回家同友人報告，友人溫馨提示可樂雞翼好易整到苦。聽罷友人意見回到總部後再隊長求證。

Pizza：唔夠甜咪苦囉！
我　 ：但係隊長話一罐可樂就搞得掂，唔洗加其他野架喎！
隊長：係架，唔洗架！
我　：咁點解啲人話苦既？
隊長：唔夠甜囉！
我　：咁你平時點整架？
隊長：加冰糖。
我　：…
我　：你又話咩都唔洗加，只係加可樂就ok(-__-")
隊長：係架！咩都唔洗加，一罐可樂就ok！
我　：咁你又話加冰糖？
隊長：係架！要加冰糖架！
我　：玩野呀!?

事實證明，師傅唔係有心要留一手，好可能佢真係留左手都唔知…

同居二三事

與朋友同居不是未曾試過，但前密友個性跟男生沒兩樣，害得我天天要等門或像個女人仔致電發短信詢問會否回家或該否"煮定飯"等門。

舊人去，新人來。

新同屋住是個非常典型的賢妻。除了時時短信問問我的動向外，每每回家都驚覺家裡粒麈不染。有時人在外又會想到家中有人等門會急急腳趕回家，開始明白做丈夫的感覺。。。

某夜，我們躺在床上，在漆黑寧靜的環境裡聊天。

我搬黎同你住，你會唔會唔慣？她問。

少少啦，最唔慣屋企執到咁乾淨，除左特攻隊突襲外真係未試過。

她聽罷嬌呻道：咁你而家鍾唔鍾意咁呀？你鍾唔鍾意咁乾淨？

 

“鍾意”一詞硬塞在喉嚨中，我不是唔鍾意，而係如果答“鍾意”成件事就基味濃之餘，我更會由女角身份一躍成為男人。立刻聯想到自己"田"係床度擔住枝事後煙的情景就打住了。撐遠了，經過一輪思想整合後，我選擇了一個不失大體又含蓄的回應：乾淨都唔錯呀。

我又記起以往只有我Cher 花肥、Miss 3，估唔到如今風水輪流轉。
 

秋季大旅行

其實我真係唔係Childen Lover type，但係Hei Hei 同nut nut真係好可愛~

而家啲小朋友真係好大膽＠＠

識得我耐既朋友都知，其實我係獨家村，平時都唔係好好一大堆人既活動，間唔使一次兩次都ok。估唔到今次發掘到同事好多不同既一面。

立法會投票記

我問隊長尋日有無投票，佢話無心水所以無投。我話早知叫你投公民袋同龐一鳴啦！隊長話你早兩日打俾我嘛!
我即刻同佢上返堂公民教育，傻啦，呢啲野唔可以俾人影響架，唔係人地叫你投乜就投乜，果唔係呢啲就係做假。

我再問隊長，你無投長毛咩？(隊長係第一代長毛支持者)。佢即刻面露尷尬，無啦…都唔知佢做乜…
其實我都要同你道歉，當年我唔應該笑你投俾長毛，其實長毛真係唔錯。
隊長即刻懶醒，緊係啦，我一早就知佢做得野先投佢~
咁你當年點解會投俾佢？我問。
立法會咁悶，加長毛係入面幾好玩呀~隊長天真地笑道。

香港，勝在有搞事師奶…